Пасля сустрэчы з віцэваяводам: сумесная праца над праграмай
Працоўны кантакт з адміністрацыяй, праграма для падрыхтоўкі дакументаў і планы ўзмацніць каманду, якая выдае даведкі, з кастрычніка.
Прадстаўнікі нізавой грамадзянскай ініцыятывы жыхароў Памор’я Tu Żyjemy сустрэліся з паморскім віцэваяводам Эмілем Ройкам і дырэктаркай аддзела па справах іншаземцаў Жанэтай Ентай. Ад Tu Żyjemy ў сустрэчы ўдзельнічалі Olga Winnik, Ksenia Naranovich і Walentyn Kariejew. Размова тычылася праблем легалізацыі побыту, арганізацыі працы ўпраўлення і магчымых паляпшэнняў.
Сумесная праца над праграмай
Важны вынік сустрэчы — наладжванне працоўнага кантакту з адміністрацыяй і пачатак сумеснай працы над канцэпцыяй праграмы, якая дапаможа рыхтаваць дакументы. Упраўленне прызначыла кантактную асобу, якая дапаможа ўлічыць досвед супрацоўнікаў, што непасрэдна разглядаюць заявы. Мы бачым у гэтым першы канкрэтны і важны вынік дыялогу паміж іншаземцамі і адміністрацыяй.
Праграма мае дапамагаць вызначаць, якія дакументы патрэбныя ў індывідуальнай сітуацыі заяўніка, і крок за крокам суправаджаць іх падрыхтоўку. Яе мэта — зрабіць патрабаванні больш зразумелымі, скараціць колькасць памылак пры падачы заяў і зменшыць патрэбу пазней дапаўняць дакументацыю.
Чарговасць разгляду спраў і кадравыя пытанні
Падчас сустрэчы мы таксама абмеркавалі чарговасць разгляду спраў. Як патлумачыла дырэктарка аддзела, раней некаторыя катэгорыі заяў разглядаліся ў прыярытэтным парадку. Цяпер такіх катэгорый стала менш, а астатнія заявы разглядаюцца ў агульнай чарзе, паводле парадку паступлення. Прадстаўнікі ўпраўлення звярнулі ўвагу на тое, што недахоп супрацоўнікаў захоўваецца. Яны паведамілі, што звярталіся з просьбай павялічыць колькасць штатных адзінак, але не атрымалі згоды. Частка цяжкасцяў звязаная з агульнадзяржаўнымі інфармацыйнымі сістэмамі і працэдурамі, змяніць якія сіламі аднаго ваяводства немагчыма.
На сустрэчы таксама патлумачылі, што анансаваныя 24 дадатковыя штатныя адзінкі, якія фінансуюцца ў межах праекта FAMI, плануюць накіраваць найперш на апрацоўку заяў аб выдачы карт побыту CUKR. Нам таксама паведамілі, што з кастрычніка 2026 года будзе ўзмоцнена каманда, якая выдае даведкі аб тым, што справа знаходзіцца на разглядзе (zaświadczenia o toczącym się postępowaniu).
Што далей
Адна з задач праграмы — дапамагчы падрыхтаваць патрэбныя дакументы ўжо на этапе падачы заявы. Найбліжэйшы крок Tu Żyjemy — вызначыць патрабаванні і падрыхтаваць пілотную версію. Наступную сустрэчу з кіраўніцтвам упраўлення плануюць прысвяціць яе прэзентацыі і абмеркаванню далейшай працы.
Наша мэта — зрабіць сістэму легалізацыі побыту больш зразумелай, прадказальнай і зручнай для людзей, якія жывуць, працуюць і будуюць сваё жыццё ў Паморскім ваяводстве. Пра ход сумеснай працы і наступныя вынікі будзем паведамляць рэгулярна.
Дыялог пачаўся. Цяпер пераходзім да канкрэтнай працы.